October 31, 2012

試婚紗Round 6~Anovia。首次遇上試衫費

來到試衫第六回,名單上心儀的婚紗禮服店都去得八八九九,亦越來越摸得清自己想要甚麼。周一晚上約了七時去Anovia,看其facebook的晚裝設計是挺有期待的,因為裙子設計有華麗的感覺。

準時到達就脫鞋子進去,店員給我兩本厚典典的相簿書,每本都重過磚頭,相片都是專業攝影師影到漂漂亮亮的,此店裙子的款式比較不一般,比較多街外少見的款式設計,簡單的有誇張的也有,但合我心意的不是太多(我真的好揀擇),兩本相簿中我第一眼看到心儀的款式只有兩件,因為以往經驗都是免費試三件的,所以我重看再重看多挑一兩件出來。

我最心儀的一件,其實設計幾似我心儀的婚紗,這是彩色版吧

店員把我選的晚裝取出掛在我面前,目測覺得質料設計還不錯,可惜我最最最心儀的那件今天不在場,無緣一見。店員亦熱心問我有甚麼喜好,多拿幾件估計我可能喜歡的款式給我看,但都不太合我心意。

然後店員問我知道它們的Policy嗎?我不知道,原來這家沒有Free trial的,試三件收費$1,000,聽到我就立即打退堂鼓了,因為我很勉強才選出比較合眼緣的幾件,還未計試上身好不好看;再者我最心儀的一件不在場;加上它們的Package Price大都是連一件婚紗計算的,婚紗我早就有著落了,所以選這間的晚裝就必須連Tuxedo租,不合預算,所以禮貌說聲要考慮就離開了。

自問不是富貴人家,如果肯付$1,000試衫,就幾乎等於會幫襯它們,無理由白白浪費一隻金牛嘛。回家翻看此店跟我在facebook的對話,沒有提及試衫需收費,細心一點的做法是先告訴客人,免大家浪費時間。

*模特兒示範婚紗相片取自該品牌facebook

10 comments:

  1. 呢間嘢越做越差,我朋友本來join咗,都嬲到要轉第二間,胃口仲越嚟越大,以前500蚊試衫費,而家收1000!

    ReplyDelete
    Replies
    1. 上網看看都搵到不少人的負面評價......

      Delete
  2. 我之前去,佢仲話佢地唔擺婚展家, 話佢地唔需要婚展個D DISCOUNT喎!
    =_='''
    咪又係係婚展見到佢地!!!

    BTW, 多謝你既分享...好有用!
    想問下ICONIC個PACKAGE幾$呀?

    ReplyDelete
    Replies
    1. Iconic五千幾一件,我去試時有promotion可以減$800

      Delete
  3. Anovia D 衫要分GRADE。D GRADE 要加1500至2000蚊不等, 連package 一件衫要over 3000!!太貴。去到連1000蚊試衫都唔俾, 要我JOIN左先得。我話上網睇有1000蚊試衫, 佢話我係第二次上黎, 無得試!!SERVICE真係好差, 又唔誠實, 又串。 好多人話我個樣都係友善都易俾人蝦, 我都頂佢唔順。我覺得, 我俾左錢, 除左買衫, Service 都好重要。我原本去到諗住JOIN PACKAGE, 最後諗都唔諗就走人。等我去ICONIC睇下先

    ReplyDelete
    Replies
    1. 租衫用咁多錢,想要好一點的服務都很正常,所以當時我寧願多走幾間,無論是服務和款式都合心意才幫襯,始終租衫唔係一次搞掂既事,又要fitting,又要去攞去還,服務態度很重要。希望你很快找到合心意的店!

      Delete
  4. 呎間真係黑店,未join已經好串,join左未仲差,自問自已態度好好,又賺佢叻,又話衫靚,我唔會貼錢買難受!!咁多間,點解要揀一間未試過上身就要俾成千銀!!結婚都係開開心心,無謂搞到自己咁唔開心!!

    ReplyDelete
    Replies
    1. 佢有佢既客路,唔適合自己睇過就算,揀舖頭都係一個學習過程呢~

      Delete
  5. Anovia 差啲整唔見咗我條婚紗 and 真係黑店!!!
    因為影兩次 prewedding 加婚禮都喺外國,所以就喺 Anovia 買咗條婚紗而唔係租,serve 我嘅係琪琪。
    開頭講到勁好服務,承諾無限次改裙,又話幫我攞去洗,一定平過出面好多,又話洗完 keep 住直到我再著為止,又會每次幫我 steam 好條裙。
    影完第一輯相,攞返去洗,冇單嘅情況下,話洗咗喇收2000幾蚊。嗰下已經覺得貴,但當時傻瓜,見琪琪好似好親切,就算數。
    到要再攞裙,搵琪琪,佢話整親放緊假,我叫佢交俾同事就得,佢就話會自己返去幫我,我仲鬼咁唔好意思。事前,我突登同佢約定日子時間,佢話 ok。
    結果我準時到,佢影都冇,而佢班同事冇一個知發生咩事。我坐咗喺度等,佢啲同事一時問我攞洗衫單,一時問我條裙咩樣,最後等咗 45 分鐘,同我講搵唔到!佢地叫我返屋企,話琪琪返緊嚟,承諾兩小時內會搵到加送上我屋企。我唯有返屋企等,我當晚就要飛去意大利。
    其實間舖可以有幾大,都唔知塞埋咗我條裙去邊,之前仲話會保存得好好!
    兩小時過咗,乜消息都冇,我就 text 琪琪啦。再等咗一陣,佢打嚟話搵唔到,叫我上去求其揀條裙頂住先,我真係急到想喊!我老公即刻飛車送我去,點知我同琪琪講話就到喇叫佢準備嘅時候,佢話忽然搵到我條裙了!我老公好清醒,一句就話,佢地 cheap 到連的士錢都慳番,要我地自己兩頭撲!
    去到意大利攞條婚紗出嚟掛,成條都係皺痕,攝影師都話我條裙攪乜,我又冇 steamer 整直佢!
    返到香港,我拎咗條裙去恆隆白洋舍洗,只係盛惠 $480,更加令我肯定俾人呃,個 salesgirl 態度再好都係假啦!

    ReplyDelete
    Replies
    1. 一世人一次嘅開心事,搞成咁真係好嬲,所以無論做咩動作都最好白紙黑字同埋有單據,呢啲有無得同消委會投訴? 冤枉錢事少,攞返個公道,同埋要等間舖頭知道佢地既問題

      Delete