豬大腸味涼粉拼紅豆沙~明記甜品

在尖沙咀逛街，我常常走路去佐敦搭巴士，因為不用轉車而且價錢更抵，飯後從尖沙咀走到佐敦也有助消化呢！不過饞嘴的我行經佐敦有時會嚷著吃糖水，路經的選擇不外乎是佳佳和澳牛，這晚走到廟街附近買電話Mon貼後，鄰店就是明記了，未試過亦未聽過，就膽粗粗試試。

整間甜品店的檯都是擺街的，一眼關七的阿姐見你在店前猶豫就落嘴頭叫你幫襯，還立即遞上餐牌，一版餐牌簡單分為單拼每碗$14，雙拼每碗$16。面對這些東拼西A拼B的甜品我總需要點時間思考，有時甚至用上刪除法去選。

終於選了涼粉拼紅豆沙($16)，我偏愛吃涼粉，但我寒底又怕多會太涼，所以搭上正氣補血媽媽必選的紅豆沙，下單時覺得這個配搭好少見，食落味道又好正常幾好味，其實當涼粉是配料加在任何款式的糖水都OK吧，情況有如珍珠奶茶的珍珠。這碗紅豆沙下了涼粉和涼粉糖水當然會溝稀，但紅豆煲得夠腍又起沙，整碗糖水夠凍而不過甜，十幾蚊絕對收貨。但附近檔口的豬大腸味實在太濃烈，吃糖水全程時間都聞到，有點倒胃口。

可惜的是此店沒有男友必點的燉蛋或燉奶，唯有點碗芒果西米露($14)，加入椰汁令整碗帶著杰杰的質感，不太甜，還算不錯。

這間店位於廟街附近，加上是街邊檔，光顧的有遊客有自遊行有食煙的大漢，望著路上經過的各種人，嗅著豬大腸的濃烈氣味，很有香港特色的草根味道。

明記甜品
地址：佐敦吳松街98C地下
http://www.openrice.com/restaurant/sr2.htm?shopid=15221