最近訪問多間餐廳，老闆都異口同聲向我呻近年生意難做，人工和食材成本勁升，這個我絕對感受得到，因為出街食飯真的越來越貴！所以相對高級餐廳，寫又平又好吃的餐廳我會更開心，因為打工仔食得最多都是「平嘢」，今日想講Big John。
牆身不是貼滿餐牌，就是掛滿狗仔的相。
這間其貌不揚的店在尖沙咀樂道，招牌設計好暗又不似旁邊食店有打燈，很容易走過其門口而不自覺，有一次我還以為店不見了。這裡既賣粥、咖喱雞翼麵、白汁斑腩飯，又賣西式早餐、沙律，甚至殺出個芝士餅來，食物選擇「立雜」到難以分類。初次來就鎖定目標吃名物──薑蔥豉油撈丁和格仔餅，連飲品的套餐賣$45，快餐店格局不用加一。
分別點了豬手撈丁和雞扒撈丁，喜歡吃硬麵的我嫌丁麵煮得有點腍，麵已淋上適量豉油，豬手撈丁旁有一堆薑絲和蔥絲，撇開薑蔥不混入麵裡吃，都會發現薑蔥味早就存在撈麵之內，那種薑蔥味討好卻不油膩。豬手大大塊有三件，燜得軟腍入味，豬皮爽彈而內裡的筋肉充滿黏性，味道和平日在雲吞麵店吃到的豬手沒兩樣。
雞扒撈丁選了黑椒汁，雞扒以油炸處理，皮脆得咔嚓一聲斷開，雞肉滑溜，惹味的黑椒汁另上不會影響雞皮的香脆度。
餐茶我點了煲檸樂加薑（跟餐+$4），太甜薑味不重，不是我想要的味道。
格仔餅是叫上的，作為小食有兩大格正方形，上面擠滿花生醬和煉奶。第一 塊香脆可口，主要用麵粉和砂糖炮製的格仔餅我不求甚麼蛋香，重點在於填滿格仔的花生醬和煉奶，為格仔餅提供軟滑甜膩的感覺。第二塊放涼了的關係餅身變得軟韌，較接近街頭版本風味。這些雖不是叫人絕讚的美食，但相比我公司附近又貴又做得hea的茶餐廳，好得多了。
Big John
地址：尖沙咀樂道17號地下
「飯氣攻心」專欄逢周四於《爽報》刊登
No comments:
Post a Comment